నార్నే నితిన్ హీరోగా నటించిన ‘ఆయ్’ చిత్రం బాక్సాఫీస్ వద్ద విజయవంతంగా రన్ అవుతున్న సంగతి తెలిసిందే. అంజి కె. మణిపుత్ర దర్శకత్వంలో రూపొందిన ఈ చిత్రంలో నయన్ సారిక కథానాయికగా నటించారు. బన్నీ వాస్ మరియు విద్యా కొప్పినీడి నిర్మాణంలో, ప్రముఖ నిర్మాత అల్లు అరవింద్ సమర్పణలో వచ్చిన ఈ సినిమా ఆగస్టు 15న విడుదలై బ్లాక్ బస్టర్ హిట్ గా నిలిచింది.
గోదావరి ప్రాంతం నేపథ్యంగా తెరకెక్కిన ఈ కామెడీ ఎంటర్‌టైనర్‌కు ప్రేక్షకుల నుంచి మంచి స్పందన లభించింది. ఆడియన్స్ మరియు విమర్శకుల ప్రశంసలతో పాటు, మాస్ స్టార్ ఎన్టీఆర్, ఐకాన్ స్టార్ అల్లు అర్జున్ లాంటి ప్రముఖులు కూడా ‘ఆయ్’ టీంను అభినందించారు.
ఈ సినిమా ఇప్పటికీ మంచి ఆక్యుపెన్సీతో, డీసెంట్ కలెక్షన్స్ తో థియేటర్లలో కొనసాగుతోంది. ఈ సందర్భంగా, ఈ వారాంతంలో ‘ఆయ్’ చిత్రం కలెక్షన్లలో నిర్మాతల వాటాలో 25% ను జనసేన పార్టీ ద్వారా ఆంధ్రప్రదేశ్ లో వరదల కారణంగా నష్టపోయిన బాధితులకు విరాళంగా అందించనున్నట్లు గీతా ఆర్ట్స్ మరియు నిర్మాత బన్నీ వాస్ ప్రకటించారు.
ఆంధ్రప్రదేశ్‌లో ఇటీవల కురిసిన భారీ వర్షాల కారణంగా వరదలు సంభవించి, ప్రజలు పెద్ద ఎత్తున ఇబ్బందులు ఎదుర్కొంటున్నారు. ఇలాంటి సమయంలో వారికి అండగా నిలిచేందుకు ‘ఆయ్’ టీమ్ ముందుకు వచ్చింది. పవన్ కళ్యాణ్ సామాజిక బాధ్యతను దృష్టిలో ఉంచుకొని, వరద బాధితులకు ఆర్థిక సహాయం చేయాలని నిర్ణయించారు.
